«Я заўсёды любіў і зараз люблю глядзець на неба…»
Алесь Бяляцкі, лаўрэат Нобелеўскай прэміі міру, праваабаронца, заснавальнік і кіраўнік праваабарончага цэнтра «Вясна», 25 верасня сустрэў свой 62 дзень народзінаў за кратамі.
«Жалезныя дзьверы і ваконныя краты густа захіснутыя жалезнымі гарызантальнымі палоскамі, якія тут ласкава называюць “расьнічкамі”, за імі ў шчыліны праглядаецца расьпілаванае бяздоннае верасьнёўскае неба і белыя ватныя аблокі», – пісаў Алесь Бяляцкі ў лісце з-за кратаў пасля затрымання ў 2011 годзе.
Алесь Бяляцкі прызнаны палітычным зняволеным і асуджаны на 10 гадоў пазбаўленне волі ў калоніі ва ўмовах узмоцненага рэжыму. З арышту ў ліпені 2021 году мае вельмі абмежаваную камунікацыю з сямʼёй, адвакатам і навакольным светам. На тэрміны ад 6 да 15 гадоў зняволення асуджаныя і іншыя «вясноўцы»: Валянцін Стэфановіч, Уладзімер Лабковіч, Марфа Рабкова, Андрэй Чапюк.
З нагоды дня народзінаў Алеся Бяляцкага ў Варшаве, Вільні, Бруселі і іншых гарадах прайшлі акцыі салідарнасці з беларускімі палітычнымі зняволенымі, у Празе адкрылася выстава ў гонар Бяляцкага, у Познані – вулічная арт-інсталяцыя, прысвечаная зняволеным «вясноўцам».
З беларускіх СМІ больш за ўсіх увагі гэтым падзеям надало «Радыё Свабода», заўважыў Media IQ: распавяло пра мерапрыемствы, агучыла меркаванні еўрапейскіх палітыкаў, праваабаронцаў і адвакатаў, у бэкграўндзе праінфармавала пра палітычна матываваны пераслед «Вясны» і самога Алеся Бяляцкага. «Наша Ніва» у сваім матэрыяле прыгадала маладосць праваабаронцы, яго літаратурную і грамадскую дзейнасць, заснаванне «Вясны», наступныя пасля гэтага пераследы. Пра біяграфію Бяляцкага, апошняе затрыманне і тое, што цяпер вядома пра яго цяжкі стан, падзяліўся з чытачамі «Белсат». Інфармацыйнай нагодай яшчэ раз прыцягнуць увагу да асобы Беяляцкага скарысталіся «Еўрарадыё», «Позірк», Reform.news, радыё «Рацыя», «Маланка Медиа». «Люстэрка» 25 верасня не ўзгадвала пра Алеся Бяляцкага.